साढे ४ करोड भोट ल्याएर बुद्ध लामा बने पहिलो नेपाल आइडल, को हुन् लामा ?

प्रतिष्ठाको पहिलो आवाज नेपाल आइडलको उपाधि पोखरा नयाँबजारका बुद्ध लामाले जितेका छन्। कतारको दोहास्थित एसियन टाउन एम्पिथिएटर, ग्रान्ड मल, सनायामा शुक्रबार राति भएको अन्तिम प्रतिस्पर्धामा निशान भट्टराई र प्रताप दासलाई उछिन्दै पोखरा नयाँबजारका बुद्ध पहिलो नेपाल आइडलको उपाधि चुम्न सफल भएका हुन्।

उत्कृष्ट तीनबाट विजेता छनोटका लागि ९ करोड ३१ लाख ८३ हजार ३ सय ३५ भोट प्राप्त भएको थियो। जसमध्ये ४ करोड ४८ लाख ४५ हजार २ सय ६३ भोट प्राप्त गर्दै बुद्धले प्रतिष्ठाको पहिलो आवाज नेपाल आइडलको उपाधि जितेका हुन्।

यो जितसँगै उनले २० लाख रुपैयाँ, महिन्द्रा केयूभी १०० कार र १५ लाख रुपैयाँको एल्बम कन्ट्र्याक प्राप्त गरेका छन्। बुद्धलाई लोकप्रिय हास्यकलाकारद्वय मदनकृष्ण श्रेष्ठ र हरिवंश आचार्य (महजोडी) ले पुरस्कार प्रदान गरे।

एपीवान टेलिभिजनबाट प्रसारित प्रतियोगितामा उर्लाबारी मोरङका निशान भट्टराई र झरुवारासी ललितपुरका प्रताप दास क्रमशः फस्ट र सेकेन्ड रनरअप घोषित भए। निशानले ३ करोड ५० लाख ८६ हजार २ सय २३ भोट प्राप्त गरे भने प्रतापले १ करोड ३२ लाख ५१ हजार ८ सय ४९ भोट पाए।

फस्ट रनरअप निशानले १५ लाख रुपैयाँ र सेकेन्ड रनरअप प्रतापले १० लाख रुपैयाँ पुरस्कार हात पारे। विजेता एवं अन्य सहभागीलाई हौसला प्रदान गर्न महजोडी कतार पुगेका थिए।

फ्रिमेन्टल मिडियाले तय गरेका आधार पूरा गर्ने नेपालको एक मात्र टेलिभिजन एपीवान एचडीमार्फत पहिलो पटक नेपालमा सुरु भएको आइडल सिरिजले सुस्ताएको नेपाली सांगीतिक क्षेत्रलाई ऊर्जा दिएको छ।

बालबालिकादेखि वृद्धवृद्धासम्म सबैले हेर्ने साझा सो बनेको छ।नेपाल आइडलको अडिसनमा हजारौं युवा सहभागी थिए। विभिन्न चरण पार गर्दै उत्कृष्ट १२ मा परेका प्रतियोगीलाई करोडौंले भोट गरे अनि सम्भवतः संसारभरका अर्बौं दर्शकले सो हेरे। यूट्युब एवं फेसबुकमा नेपाल आइडलका हरेक सो भाइरल बनेको छ।

बुद्ध लामा पोखराको बिग एफएमद्वारा आयोजित २०७० सालको बिग आइकनमा शीर्ष ४ सम्म पुगेका थिए । त्यसपछि बुद्ध स्टेज कार्यक्रममासमेत छाउन थालेका थिए । बुद्धले क्लासिकल, आधुनिक र पप सबै प्रकारका गीतमा अब्बल प्रस्तुति दिन्छन् ।

बुद्ध लामाको सांगीतिक यात्रा त्यति सहज भने छैन । उनले आफ्नो अध्ययन र संगीतलाई निरन्तरता दिन दोहोरी साँझमा पनि गीत गाए । पोखराको पोखरा दौँतरी साँझमा उनले गीत गाउने गर्थे । उनले मासिक ८ हजार रुपैयाँ पारिश्रमिक पाउँथे । बुद्ध लामाले नेपाल आइडलको अडिसनमा ‘आँखाको निद खोसिलाने’ गाएर निर्णायकलाई प्रभावित पार्न सफल भएका थिए । अडिसनदेखि नै उनले दर्शक तथा निर्णायकको मन जितेका थिए । नेपाल आइडलमा बुद्धले दिएका प्रस्तुतिहरुमा ‘उ जितेर गई वा हारेर गई’ को पस्तुति निकै नै मन पराइएको छ ।

कतारमा शुक्रबार बेलुकी भएको नेपाल आइडलको फाइनलमा उनै बुद्ध लामा विजयी घोषित भए । नेपाल आइडलको आयोजक एपिवान एचडी टेलिभिजनले कतारमा भएको फाइनललाई प्रत्यक्ष प्रशारण भने गरेको थिएन । प्राविधिक कारणले फाइनल प्रशारण गर्न नसकेको एपिवान् एचडी टेलिभिजनले जनाएको छ ।

LEAVE A REPLY

Please enter your comment!
Please enter your name here