Saturday, June 12 2021
ट्रेन्डिङ कोरोनाले बढायो आर्युेवेद औषधिको महत्व साउनपछि राष्ट्रिय जनगणनाको प्रस्ताव बढी शुल्क लिने अस्पतालमाथि उजुरी गर्न स्वास्थ्य मन्त्रालयको अनुरोध निषेधाज्ञामा जोखिम मोलेर धान रोप्दै किसान कोरोना सङ्क्रमण घट्यो जोखिम कायमै दशवटा भण्डारगृहमा करिब ३२ लाख मात्रा खोप सञ्चय गर्न सकिने वातावरण विनाशका कारक छन् ‘मानवीय व्यवहार’ गणतन्त्रको सफलताका लागि हाम्रो शैली र व्यवहार निरन्तर समीक्षाको विषय बन्नुपर्छ : देउवा बढ्यो बजेटको आकार: आगामी आर्थिक वर्षको बजेट १६ खर्ब ४७ अर्ब ५७ करोड बाइडेनद्वारा ६० खर्ब डलरको बजेट प्रस्तुत अब अनलाइन नवीकरण गर्नु नपर्ने नयाँ नक्सा र शान्तिवार्ता वर्ष २०७७ को महत्वपूर्ण सफलता हो : राष्ट्रपति

निषेधाज्ञाको प्रभाव औद्योगिक क्षेत्रमा, ७० प्रतिशत सञ्चालनमा

निषेधाज्ञाको प्रभाव औद्योगिक क्षेत्रमा, ७० प्रतिशत सञ्चालनमा

हेटौँडा, वैशाख २५ गते । कोरोना भाइरसको दोस्रो लहर सुरु भएसँगै कोरोना सङ्क्रमणको जोखिम नियन्त्रण गर्न हेटौँडा उपमहानगरपालिकासहित जिल्लाका चार स्थानीय तहमा गरिएको निषेधाज्ञाको प्रभाव औद्योगिक क्षेत्रमा परेको छ । आइतबार रातिबाट निषेधाज्ञा जारी भएसँगै हेटौँडा औद्योगिक क्षेत्रका उद्योगहरूले उत्पादन कटौती गर्न थालेका छन् । 
औद्योगिक क्षेत्रमा रहेका उद्योगहरू अहिले ७० प्रतिशत क्षमतामा मात्र सञ्चालनमा छन् । उद्योगहरू दिउँसो सञ्चालन भए पनि राति भने सीमित सङ्ख्यामा मात्र सञ्चालन भइरहेको औद्योगिक क्षेत्र व्यवस्थापनले जनाएको छ । हेटौँडा औद्योगिक क्षेत्र व्यवस्थापन कार्यालयका क्षेत्र व्यवस्थापक राजेन्द्र कँडेलका अनुसार निषेधाज्ञा जारी भएपछि उद्योगहरू ७० प्रतिशत क्षमतामा मात्र सञ्चालन भइरहेका छन् । उहाँले औद्योगिक क्षेत्रभित्र रहेका उद्योगहरूले सामान्य अवस्थामा खपत गर्ने विद्युत् र अहिले दिउँसोको विद्युत्को लोड हेर्दा ७० प्रतिशत उपयोग गरेको पाइएकाले उद्योगहरू पूर्ण क्षमतामा नचलेको पाइएको बताउनुभयो । उहाँले कम कामदार–कर्मचारी रहेका अधिकांश उद्योगले कामदार–कर्मचारीहरू उद्योगभित्रै राखेर सञ्चालन गर्दै आएको जानकारी दिनुभयो । 
हेटौँडा औद्योगिक क्षेत्रमा चालू अवस्थामा रहेका ११२ उद्योगमध्ये निषेधाज्ञा जारी भएपछि ३० वटाभन्दा बढी उद्योग बन्द भएका छन् । बाँकी उद्योगलाई आवश्यक कच्चा पदार्थ आयात र उत्पादित वस्तु बजारमा आपूर्ति गर्न अहिलेसम्म सहज अवस्था भएकाले उद्योगहरूले उत्पादनलाई निरन्तरता दिँदै आएका छन् तर पछिल्लो समयमा माग घट्दै गएको र निषेधाज्ञाको समय लम्बिएर पसल, व्यवसाय र निर्माणका काम बन्द हुने क्रम बढ्दै गएमा उद्योगहरूले मजदुरसँगै उत्पादनमा थप कटौती गर्ने देखिएको छ । 
स्थानीय प्रशासनले उद्योगमा कार्यरत कामदार–कर्मचारीलाई बिहान उद्योगमा लैजान र बेलुका घर फिर्ता गर्न सवारी साधन सञ्चालन गर्न सहज बनाएका कारण उद्योग सञ्चालनमा सहज भएको छ । उत्पादनको माग हुन छाडेपछि दैनिक उपभोग्य वस्तु उत्पादन गर्नेबाहेकका उद्योग बन्द गर्नुको विकल्प नहुने औद्योगिक क्षेत्र व्यवस्थापक कँडेलले बताउनुभयो । 
निषेधाज्ञा जारी भएसँगै बन्द गरिएको हेटौँडा औद्योगिक क्षेत्रस्थित एन्टारटिक बिस्कुट उद्योग बिहीबारदेखि सञ्चालनमा ल्याइने भएको छ । स्थानीय प्रशासनले उद्योगमा कार्यरत कामदार–कर्मचारीलाई ल्याउन लैजान सवारी पासको व्यवस्था गरेपछि बिहान ६ः०० बजेदेखि साँझ ६ः०० बजेसम्म र साँझ ६ः०० बजेदेखि भोलिपल्ट बिहान ६ः०० बजेसम्म एउटा मात्र प्लान्ट सञ्चालन गर्नेगरी उद्योगले उत्पादन थाल्ने भएको हो । 
स्थायी र ज्यालादारी गरी तीन सयभन्दा बढी कामदार–कर्मचारीले काम गर्दै आएको उद्योगमा एक पटकमा ८० जना मात्र कामदार–कर्मचारी राखेर उद्योग सञ्चालन गर्न लागेको उद्योगका प्रशासन प्रबन्धक रामहरि न्यौपानेले जानकारी दिनुभयो । उहाँले स्थायी कामदार–कर्मचारी मात्र राखेर उद्योग सञ्चालन गर्न लागेको बताउँदै उत्पादन क्षमताभन्दा कम क्षमतामा उद्योग सञ्चालन हुने बताउनुभयो । 
 

 

कमेन्ट गर्नुहोस्