दार्चुला घटनामा संलग्न दोषीलाई कडा कारवाही गर्न सांसदहरुको माग

काठमाडौं, साउन २० गते । राष्ट्रिय सभा बैठकमा सत्तापक्ष र प्रतिपक्षी दलका सांसदहरुले दार्चुला घटनाका विषयमा गम्भीर छानबिन गरी दोषीमाथि कारवाहीको माग गर्नुभएको छ । सत्ता गठबन्धन दलका सांसद तथा प्रतिपक्षीदलका सांसदहरु सबैले एक स्वरमा ‘मानवताविरोधी घटना’ संज्ञा दिंदै भारतीय पक्षलाई क्षमायाचना माग्न सुझाव दिनुभयो ।

संसद् भवन बानेश्वरमा बुधबार बसेको राष्ट्रिय सभा बैठकमा धारणा राख्दै सांसदहरुले सो माग गर्नुभएको हो । सांसदहरुले बैठकको विशेष समय र शून्य समयमा धारणा राख्नुहुँदै जनताको दैनन्दिन समस्या समाधानमा ध्यान दिन पनि सरकारको ध्यानाकर्षण गराउनुभयो ।

नेकपा (माओवादी केन्द्र) का सांसद नारायणकाजी श्रेष्ठले नेपालमाथि विदेशी हस्तक्षेप हुनेक्रम जारी रहेको बताउनुभयो । नेपालका दलले पनि विदेशी हस्तक्षेप आमन्त्रित गरिरहेको उहाँले टिप्पणी गर्नुभयो । प्राकृतिक स्रोत साधनमा पारस्परिक हितमा प्रयोग गर्नुपर्ने भएपनि विदेशी शक्तिले आफ्नो स्वार्थमा मात्र केन्द्रीत गरेको बताउनुभयो । नेपाललाई रणीतिक स्वार्थकोरुपमा प्रयत्न गर्ने काम भइरहेकाले नेपाल र नेपाली सबैजना सचेत हुनुपर्ने उहाँले चर्चा गर्नुभयो ।

महाकाली नदीमा तुइन तर्दैगर्दा दार्चुलाका जयसिंह धामी नदीमा खसेर हराउनुभएको घटना गम्भीर रहेको र त्यसमा भारतीय एसएसवीको संलग्नताबारे उचित छानबिन गर्न उहाँले माग गर्नुभयो । तुइनको तार काटिएकै कारण धामी नदीमा खसेर बेपत्ता भएको समाचार आइरहेकाले त्यो अमानवीय घटनाको उहाँले घोर भर्त्सना गर्नुभयो । भारतीय पक्षलाई तत्काल क्षमायाचना माग्न माग गर्दै उहाँले त्यस्तो घटना पुनः हुन नदिनेप्रति सरकारले ध्यान दिनुपर्ने उहाँले बताउनुभयो ।

अहिले नेपालमा राजनीतिक ध्रुवीकरण भइरहेको भएपनि राष्ट्रियता र सार्वभौमसत्ताको पक्षमा सबै दल र नेपाली एक ठाउँमा रहेको उहाँले बताउनुभयो । लोकतन्त्रका विरुद्धमा पुराना सामन्ती शक्तिहरुले अझै तानाबाना बुनिरहेको चर्चा गर्नै सांसद श्रेष्ठले भन्नुभयो, “देश र जनताको निम्ति शहिद र पुर्खालाई केन्द्रमा राखेर आफ्नो गल्ती कमजोरीको आत्मसमीक्षा गर्दै अघि बढौं ।”

नेकपा (एमाले) का सांसद खिमलाल भट्टराईले वर्तमान सरकार अलोकतान्त्रिक, असंवैधानिक सरकार भएको टिप्पणी गर्नुहुँदै जनताको मुद्दा छायाँमा पर्न थालेको बताउनुभयो । राजनीतिको नाममा देश र जनताको भावनामा मजाक भइरहेको चर्चा गर्नुहुँदै सांसद भट्टराईले भन्नुभयो, “लोकतन्त्र अहिले हारेको छ, लोकतन्त्र हार्दा कुनै दलको जित हुँदैन, जनताको पनि जित हुँदैन ।”

जनताको हित र देशको पक्षमा एमाले सङ्घर्ष गर्न जहिले तयार रहेको उहाँले बताउनुभयो । अहिले पनि एमाले सबैभन्दा ठूलो दल भएकाले हेक्का राख्न उहाँले आग्रह गर्नुभयो । कोभिड खोप लिन पनि सोर्सफोर्स लगाउने अवस्था सिर्जना भएको टिप्पणी गर्नुहुँदै उहाँले भन्नुभयो, “यसअघिको सरकारले ल्याएको कोभिड खोप पनि व्यवस्थितरुपमा यो सरकारले वितरण गर्न सकेन ।” दार्चुला घटना जघन्य मानवताविरुद्धको अपराध भएकाले गम्भीर भएर छानविन गर्न उहाँले सरकारसँग माग गर्नुभयो ।

नेपाली काँग्रेसका सांसद अनिता देवकोटाले दार्चुला घटनामा ज्यान गुमाउनुभएका जयसिंह धामीको घटनामा संलग्नको खोजी गरी कडा कारवाही गर्न माग गर्नुभयो । पीडित परिवारका सदस्यलाई उचित क्षतिपूर्तिको माग पनि उहाँले गर्नुभयो । जनताले अहिले काम र परिणाम खोजेको भन्नुहुँदै उहाँले सरकारको प्रचार नखोजेको चर्चा गर्नुभयो ।

जनता समाजवादी पार्टी (जसपा) का सांसद शेखरकुमार सिंहले मधेसको मुद्दामा सुनुवाइ गर्न सरकारसँग माग गर्नुभयो । एमाले सांसद सिंहबहादुर विश्वकर्माले हेलम्बुमा आएको बाढी पहिरोले त्यहाँका नागरिक विस्थापित भएकाले राहत तथा व्यवस्थापनमा ध्यान दिन सरकारसँग आग्रह गर्नुभयो ।

एमाले सांसद ठगेन्द्रप्रकाश पुरीले भूमिसम्बन्धी आयोग सरकारले विघटन गरेर जनताको हितमाथि घात गरेको टिप्पणी गर्नुभयो । संविधानअनुसार गठन भएको आयोगलाई विघटन गरी सरकारले अनुचित काम गरेको उहाँले बताउनुभयो । भूमिहीनको लगत लिएर लालपुर्जा वितरण गर्ने चरणमा रहेको आयोग विघटन गरेर भूमिहीनको समस्यामाथि सरकारले खेलवाड गरेको उहाँले टिप्पणी गर्नुभयो ।

विशेष समयमा सभा सदस्यहरु इन्दु कडरिया, रामलखन चमार, भगवती न्यौपाने, गोपीबहादुर सार्की लगायतले धारणा राख्नुभएको थियो । त्यस्तै, बैठकको शून्य समयमा सभा सदस्यहरु कोमल वली, खिमलाल देवकोटा, चक्रप्रसाद स्नेही, जगप्रसाद शर्मालगायतले आफ्नो धारणा राख्नुभएको थियो ।