काठमाडौँ, असोज ७ गते । महाराजगञ्जस्थित त्रिभुवन विश्वविद्यालय शिक्षण अस्पतालमा नेपालकै पहिलो पुरुष स्वास्थ्य क्लिनिक सञ्चालनमा आएको छ । पुरुषमा देखिने यौन स्वास्थ्यसम्बन्धी समस्या पहिचान, परीक्षण तथा उपचारका लागि विभिन्न विधाका विशेषज्ञ चिकित्सकको सेवा एउटै ठाउँबाट उपलब्ध गराउने उद्देश्यले क्लिनिक सञ्चालनमा ल्याइएको हो ।
संयुक्त राष्ट्रसङ्घीय जनसङ्ख्या कोष (युएनएफपिए), सुनौलो परिवार नेपाल र स्थानीय एकीकृत विकास समाज नेपाल (सोलिड नेपाल)को सहयोगमा शिक्षण अस्पतालले पुरुष स्वास्थ्य क्लिनिक सञ्चालनमा ल्याएको हो ।
क्लिनिकको शुभारम्भ त्रिभुवन विश्वविद्यालय चिकित्सा शास्त्र अध्ययन संस्थानका डीन प्राडा. मोहनराज शर्माले गर्नुभयो । उहाँले पुरुष स्वास्थ्य तथा यौन स्वास्थ्यसम्बन्धी समस्या खुलेर उपचारका लागि आउने वातावरण निर्माण गर्न क्लिनिकले सहयोग पुग्ने बताउनुभयो ।
क्लिनिक सञ्चालनको नेतृत्व गर्नुभएका महाराजगञ्ज मेडिकल क्याम्पसका सहायक क्याम्पस प्रमुख डा. खेमबहादुर कार्कीले पुरुषमा देखिने यौन स्वास्थ्यसम्बन्धी समस्या बहुआयामिक भएकाले एउटै विशेषज्ञको सेवाबाट मात्र सबै समस्या सम्बोधन गर्न कठिन हुने बताउनुभयो । पुरुषका यौनसम्बन्धी समस्या बृहत् र बहुपक्षीय हुने भएकाले यस्ता समस्याको पहिचान तथा उपचारका लागि विभिन्न विधाका विशेषज्ञको सेवा एकै ठाउँबाट उपलब्ध गराउने गरी क्लिनिक स्थापना गरिएको उहाँले बताउनुभयो ।
डा. कार्कीका अनुसार पुरुषमा यौन इच्छामा कमी हुने, यौन उत्तेजना नहुने वा कम हुने, चरम आनन्द प्राप्त गर्न कठिन हुने, यौनसम्पर्कका क्रममा पीडा हुने तथा यौन सन्तुष्टि प्राप्त गर्न नसक्नेलगायतका समस्या देखिने गरेका छन् । यस्ता समस्या शारीरिक तथा मानसिक दुवै कारणबाट उत्पन्न हुन सक्ने भएकाले आवश्यकताअनुसार विभिन्न विधाका विशेषज्ञबाट परीक्षण तथा उपचारको व्यवस्था गरिएको उहाँले बताउनुभयो ।
डा. कार्कीका अनुसार सन् २०२४ मा नेपालका ३४ जिल्लामा गरिएको राष्ट्रियस्तरको अध्ययनले यौन स्वास्थ्यसम्बन्धी समस्या उल्लेख्य रहेको देखाएको थियो । उहाँले अध्ययनमा यौन दुर्बलताको समस्या महिलामा ६७ प्रतिशत र पुरुषमा ७२ प्रतिशत देखिएको जानकारी दिनुभयो ।
महिलाका लागि स्त्री तथा प्रसूति रोगसम्बन्धी सेवासँगै यौन स्वास्थ्यका समस्या सम्बोधन गर्ने विभिन्न स्वास्थ्य सेवा उपलब्ध भए पनि पुरुषका लागि यौन स्वास्थ्यसम्बन्धी समस्यामा केन्द्रित एकीकृत सेवा पर्याप्त नभएको उहाँले बताउनुभयो ।
शिक्षण अस्पतालका युरोलोजी विभाग प्रमुख डा। पवनराज चालिसेले पुरुषत्वसम्बन्धी स्वास्थ्य समस्या उल्लेख्य रहे पनि उपचारका लागि छुट्टै समन्वित सेवा उपलब्ध नहुँदा धेरै पुरुष उपचारबाट वञ्चित हुने अवस्था रहेको बताउनुभयो । पुरुषत्वसम्बन्धी स्वास्थ्य समस्या गम्भीर रूपमा देखिए पनि त्यसको पहिचान र उपचारका लागि कहाँ जाने भन्ने स्पष्ट व्यवस्था नहुँदा समस्या हुने गरेको उहाँले बताउनुभयो । यही आवश्यकतालाई ध्यानमा राखेर पुरुष स्वास्थ्य क्लिनिक सञ्चालन गरिएको उहाँको भनाइ छ ।
पुरुषमा देखिने यौन स्वास्थ्यसम्बन्धी समस्या उच्च रक्तचाप, मधुमेह, मुटु तथा रक्तनलीसम्बन्धी रोगलगायत दीर्घकालीन नसर्ने रोगसँग पनि सम्बन्धित हुन सक्ने चिकित्सकहरूले बताउनुभएको छ । त्यस्तै, तनाव, चिन्ता तथा अन्य मानसिक स्वास्थ्य समस्याले पनि यौन स्वास्थ्यमा असर पार्न सक्ने भएकाले क्लिनिकमा शारीरिक तथा मानसिक दुवै पक्षलाई ध्यान दिइने भएको छ ।
कार्यक्रममा हर्मोनरोग विशेषज्ञ डा. नरेश पराजुली, मानसिक रोग विशेषज्ञ प्राडा. मनिषा चापागाईँलगायतले पुरुष स्वास्थ्यसम्बन्धी समस्याको पहिचान र उपचारका लागि बहुविशेषज्ञ सेवा आवश्यक रहेको बताउनुभयो ।
दैनिक चार घण्टा सेवा
पुरुष स्वास्थ्य क्लिनिकमा हरेक दिन बिहान ९ देखि दिउँसो १ बजेसम्म प्रारम्भिक जाँच तथा आवश्यक स्वास्थ्य परीक्षण गरिने भएको छ । सोमबार, मङ्गलबार र बिहीबार समस्याको प्रकृति हेरी सम्बन्धित विशेषज्ञ चिकित्सकबाट थप सेवा उपलब्ध गराइने अस्पतालले जनाएको छ ।
हाल क्लिनिकमा मूत्ररोग, स्नायुरोग, मानसिक रोग तथा हर्मोन वा ग्रन्थिरोग विशेषज्ञबाट सेवा उपलब्ध हुने भएको छ । पुरुष स्वास्थ्यसम्बन्धी सेवा विस्तार गर्न अस्पतालले थप जनशक्ति तयार गर्ने तथा चिकित्सकलाई विशेष फेलोसिपका लागि पठाउने तयारीसमेत गरेको डा. चालिसेले बताउनुभयो ।
क्लिनिकमा सेवा लिन चाहने सेवाग्राहीले अस्पतालको बहिरङ्ग सेवा (ओपिडी)मा पुरुष स्वास्थ्य क्लिनिकको टिकट लिनुपर्नेछ । त्यसपछि आवासीय चिकित्सकबाट प्रारम्भिक स्वास्थ्य परीक्षण तथा समस्या पहिचान गरिनेछ ।
डा. कार्कीले प्रारम्भिक परीक्षणपछि आवश्यकताअनुसार सम्बन्धित विशेषज्ञ चिकित्सककहाँ थप परीक्षण तथा उपचारका लागि पठाउने व्यवस्था मिलाइएको बताउनुभयो । पुरुष स्वास्थ्यसम्बन्धी समस्या लुकाएर राख्ने वा उपचारका लागि जान हिचकिचाउने प्रवृत्तिका कारण समस्या थप जटिल बन्न सक्ने भएकाले समयमै स्वास्थ्य परीक्षण तथा उपचारका लागि आउन उहाँले आग्रह गर्नुभयो ।
कमेन्ट गर्नुहोस्